Ítalska félagið Milan er komið í 8-liða úrslit ítalska bikarsins eftir 3-1 sigur á Genoa í framlengdum leik á San Síró í kvöld.

Norski varnarmaðurinn Leo Ostigard skoraði í fyrsta leik sínum fyrir Genoa á 17. mínútu með hörkuskalla eftir hornspyrnu. Ostigard er á láni hjá Genoa frá Brighton.

Olivier Giroud jafnaði metin þegar stundarfjórðungur var eftir af leiknum. Theo Hernandez fékk boltann á vinstri vængnum, tók hann í fyrsta inn í teiginn og þar var Giroud, með mann í sér, og skallaði í boltann í netið.

Staðan 1-1 eftir venjulegan leiktíma en undir lok fyrri hálfleiks framlengingar skoraði portúgalski framherjinn Rafael Leao gæðamark. Leao lék sér með boltann á vinstri vængnum, tók eina gabbhreyfingu áður en hann vippaði boltanum á fjær í stöng og inn.

Alexis Saelemaekers gulltryggði síðan sigurinn þegar átta mínútur voru eftir og lokatölur 3-1. Milan mætir annað hvort Lazio eða Udinese í 8-liða úrslitum.