Kristján Guðmundsson þjálfari Stjörnunnar kom í viðtal eftir 2-0 tap sinna kvenna gegn Val í bestu deild kvenna í kvöld. Hann hafði þetta að segja um leikinn í kvöld.
"Þetta er svona leikur að ég held að hvorugt lið hafi fengið færi í þessum leik, nema að þú kallir skallann frá Jasmínu úr horninu þegar hún skallaði yfir færi en þá eru engin færi í þessum leik."
Lestu um leikinn: Stjarnan 0 - 2 Valur
"Það eru tvö horn sem skilja á milli og seinna hornið var dæmt horn sem að á náttúrulega að vera markspyrna, en þannig er það bara. Þannig að heilt yfir vorum við bara gott lið.".
Kristján var ánægður með sitt lið og spilamennsku liðsins.
"Við erum stóra liðið í þessum leik, það erum við sem erum að gera eitthvað þannig að við erum ánægð með það.
Stjarnan mætir Aftureldingu í næsta leik og segir Kristján að því fylgi ákveðin óvissa að mæta Aftureldingu á þessum tímapunkti, en þær bættu við sig þónokkrum leikmönnum á síðasta degi félagsskiptagluggans sem lokaðist á miðvikudagskvöld.
"Það er eiginlega vonlaust að vita hvað maður á að gera á móti Aftureldingu, ég held þær séu með nýtt lið frá því í gær en já, nú erum við búnar að spila tvo leiki án þess að skora þannig að við þurfum að fá færi, við þurfum að skora, komast á það að skora. Þótt við höfum reyndar verið að spila við sterk lið núna í vikunni en þá viljum við fara að skora mörk.".
Viðtalið í heild sinni má sjá í spilaranum hér að ofan.
