Aron á æfingu á Möltu í dag.
Aron Einar Gunnarsson, fyrirliði íslenska landsliðsins, á fínar minningar af Ta'Qali leikvanignum í Möltu en hann spilaði sinn fyrsta landsleik þar árið 2008.
„Það var á móti Hvíta-Rússlandi á Möltumótinu 2008. Þetta eru ágætis minningar, það var mikil spenna að spila fyrsta leikinn. Ég, Theódór Elmar og Bjarni Viðars fórum áfram í U-21 árs verkefni eftir það. Við spiluðum bara einn leik hérna," sagði Aron.
Aron þekkir Michael Mifsud, skærustu stjörnu Maltverja, en þeir léku saman hjá Coventry á sínum tíma.
„Hann er snöggur þó hann sé orðinn 35 ára. Hann hefur ennþá hraða og tækni. Hann er flottur gaur sem var gaman að spila með þegar hann var aðeins yngri."
Malta er í 178 sæti á heimslista FIFA en liðið hefur ekki unnið marga leiki undanfarin ár.
„Þeir hafa verið að vinna í varnarleiknum, þeir eru með ítalskan þjálfara sem er að vinna í því. Þeir hafa verið að ná ágætis úrslitum þó að stigin séu ekki mörg. Þeir hafa ekki verið að tapa stórt á móti fínum liðum."
Ísland komst auðvitað á EM í sumar og hefur árið hjá landsliðinu verið gjörsamlega magnað.
„Þetta er búið að vera okkar besta ár og við munum muna eftir þessu ári í einhvern tíma. Það er um að gera að klára þetta ár á góðum úrslitum. Heilt yfir er þetta ár búið að vera frábært og við viljum klára það almennilega á móti Möltu," sagði Aron.
Viðtalið má sjá í heild sinni hér að ofan.
Athugasemdir
