Ofurskalli Ólafs Þórðarsonar tryggði sigurinn
Úr umfjöllun Morgunblaðsins um leikinn þann 16. september.
Forsíða DV daginn eftir leik.
Ólafur Þórðarson.
Myndbandið að ofan er birt með góðfúslegu leyfi RÚV
Þá er komið að "Tímavélinni" en þar förum við aftur í tímann og skoðum gamla leiki og gömul eftirminnileg atvik. Við endurbirtum þessa grein vegna þess að í dag eru nákvæmlega 22 ár síðan umræddur leikur fór fram.
Við förum til 15. september 1993 þegar magnað Skagalið vakti mikla athygli fyrir framgöngu sína í Evrópukeppni.
Þá er komið að "Tímavélinni" en þar förum við aftur í tímann og skoðum gamla leiki og gömul eftirminnileg atvik. Við endurbirtum þessa grein vegna þess að í dag eru nákvæmlega 22 ár síðan umræddur leikur fór fram.
Við förum til 15. september 1993 þegar magnað Skagalið vakti mikla athygli fyrir framgöngu sína í Evrópukeppni.
Sigur ÍA á Feyenoord í 1. umferð Evrópukeppni meistaraliða 1993 er einn allra glæsilegasti sigur sem íslenskt félagslið hefur unnið. ÍA vann fyrri leikinn sem fram fór á Laugardalsvelli 1-0. Úrslit sem sárafáir bjuggust við og vöktu þau athygli um alla Evrópu.
Ólafur Þórðarson skoraði markið eftirminnilega sem tryggði Skagamönnum sigurinn. Það kom á 75. mínútu leiksins og var hreint út sagt stórglæsilegt. Sóknin hófst við vítateig ÍA þar sem Sigursteinn Gíslason lyfti boltanum glæsilega á Mihajlo Bibercic sem braust upp vinstri kantinn í samvinnu við Harald Ingólfsson og sendi svo boltann fyrir. Þar mætti Ólafur Þórðarson á mikilli siglingu og skallaði boltann af krafti í netið.
„Ég var aftarlega í vítateignum en sá möguleikann og svo sá ég bara þegar boltinn lá í netinu. Það var meiri háttar tilfinning, alveg frábær," sagði Ólafur Þórðarson um sigurmarkið í viðtali strax eftir leik.
Hollenskir fjölmiðlar fóru ekki fögrum orðum um frammistöðu Feyenoord í leiknum. Hollensku meistararnir voru taplausir á tímabilinu þegar kom að þessum leik á Laugardalsvelli. „Hneyksli að 11 ólaunaðir leikmenn í pínulitlu félagi á Íslandi vinni besta knattspyrnulið Hollands," stóð í einu af blöðunum.
Farið í alla leiki til að vinna
„Hugarfarið í liðinu á þessum tíma var þannig að við trúðum því ekki að við gætum tapað leikjum," sagði Sigursteinn Gíslason í viðtali um leikinn sem birt var 2011. Sigurteinn var meðal bestu manna á Laugardalsvellinum þetta septemberkvöld 1993 sem leikurinn fór fram.
„Ég hef aldrei upplifað svona andrúmsloft áður. Menn fóru í alla leiki til að vinna og höfðu ekki trú á að neitt annað myndi gerast. Við lentum stundum undir en þá skiptu menn bara um gír í smá stund og kláruðu leikina. Þannig var bara sumarið hjá okkur."
ÍA var með feykilega öflugt lið á þessum tíma og vann bæði Íslands- og bikarmeistaratitilinn þetta ár. Þeir sýndu styrk sinn bersýnilega í þessum leik. Áður en kom að leikjunum gegn Feyenoord lögðu þeir albanska liðið Partizani Tirana í forkeppninni. „Fyrir einvígið gegn Tirana var vitað að sigurliðið myndi mæta Feyenoord. Það skapaðist gríðarleg stemning við það," segir Sigursteinn.
Arnar Gunnlaugsson í liði Feyenoord
„Feyenoord var með stór nöfn í liðinu á þessum tíma auk þess sem tvíburarnir Arnar og Bjarki Gunnlaugssynir voru í liðinu. Það var þó aðeins Arnar sem spilaði þennan leik. Þeir spiluðu náttúrulega með okkur árið á undan og voru á fyrsta ári þarna úti sem kryddaði þetta skemmtilega.
„Leikurinn sjálfur var stórkostlegur af okkar hálfu og sennilega einn besti leikur sem íslenskt lið hefur spilað í Evrópukeppni. Það voru allir tilbúnir að deyja fyrir málstaðinn og leikurinn vel settur upp. Það er reyndar óþolandi að Óli skyldi hafa skorað þetta mark því hann lifir á þessu að eilífu," sagði Sigursteinn kíminn þegar hann rifjaði leikinn upp.
Skagamenn þóttu sýna ótrúlegt öryggi og sjálfstraust í leiknum og Guðjón Þórðarson, þjálfari liðsins, var að vonum kátur í viðtali við DV eftir hann. „Þetta er einn markvissasti og skemmtilegasti leikur sem ég hef stjórnað hjá ÍA," sagði Guðjón.
15. september 1993 - Evrópukeppni meistaraliða
ÍA - Feyenoord 1-0
1-0 Ólafur Þórðarson (75.)
Áhorfendur: 6.327
Lið ÍA: Kristján Finnbogason - Sturlaugur Haraldsson. Sigursteinn Gíslason, Ólafur Adolfsson, Lúkas Kostic - Ólafur Þórðarson, Alexander Högnason, Sigurður Jónsson, Haraldur Ingólfsson - Þórður Guðjónsson, Mihajlo Bibercic.
Lið Feyenoord: Ed de Goey - Johnny Metgod, Peter Bosz, John De Wolf - Errol Refbs, Rob Maas, Arnold Schoíten, Rob Witschge - Gasion Taument, John van Loen, Arnar Gunnlaugsson.
Stress í mönnum í seinni leiknum
Feyenoord sýndi allt annan og betri leik í síðari viðureign liðanna í Rotterdam og vann öruggan 3-0 sigur sem fleytti þeim áfram í keppninni. ÍA féll þó út með mikilli sæmd.
„Við skitum bara upp á herðarblöð í seinni leiknum og menn voru stressaðir. Ég get nefnt dæmi með Bibercic sem var frábær þetta sumar. Þegar við erum í göngunum á leið út á völlinn og erum að labba upp tröppurnar kemur fyrirliði Feyenoord að Bibercic. Hann sparkar aftan í hann og segir: „Þú ert ekki að fara að gera neitt hér í dag!". Mikki kom eins og hrísla inn á völlinn og gat ekki blautan. Hann var bara tekinn úr sambandi fyrir leikinn," sagði Sigursteinn.
Yfir þúsund Íslendingar voru á vellinum í seinni leiknum og vöktu mikla athygli. „Íslensku stuðningsmennirnir sköpuðu frábæra stemningu í bænum og komu Hollendingum á óvart. Það átti enginn von á svona frá litla Íslandi," sagði Sigursteinn Gíslason.
Ef lesendur hafa ábendingar um áhugavert efni í "Tímavélina" má senda tölvupóst á [email protected]
Sjá einnig:
Eldra efni í Tímavélinni
