Þessi þrítugi miðjumaður er í besta formi lífs síns þessa stundina en hann hefur verið gríðarlega mikilvægur á frábæru tímabili Manchester City.

Gundogan hefur skorað þrettán mörk og lagt upp þrjú í 26 leikjum með City á tímabilinu þar af ellefu mörk í síðustu fimmtán leikjum.

City er með góða forystu á toppnum en Gundogan er þegar farinn að huga að því hvað hann ætlar að gera eftir ferilinn. Hann ætlar út í þjálfun en þýski landsliðsmaðurinn segist hafa lært af þeim bestu.

„Það var ekki fyrir svo löngu sem ég spurðist fyrir um upplýsingar um hvernig þetta gengur fyrir sig ef ég ætlaði mér að taka þjálfararéttindin. Þetta er meira en bara hugmynd," sagði Gundogan.

„Staðreyndin er sú að með Pep Guardiola, Jürgen Klopp og Thomas Tuchel, þá hef ég verið með bestu þjálfara í heimi til þessa. Maður lærir mikið og hugsar hvernig maður getur miðlað þessari þekkingu áfram eftir ferilinn," sagði hann í lokin.