„Ef við horfum á það sem er búið að ganga á, þá höfum við verið í erfiðum kafla síðustu nokkra leiki. Eftir svona langt frí hefðum við ekki geta beðið um betri leik en besta liðið í landinu. Við sýndum að við getum unnið öll þessi lið og frábært að við náum sigurmarkinu í lokin og fáum týpískt Valsmark. Frábær bolti frá Sigga og Patrick tryggir okkur sigurinn," sagði Aron Jóhannsson sem skoraði sitt fyrsta mark fyrri Val í 3 - 2 sigri á toppliði Breiðabliks í Bestu-deildinni í kvöld.
Lestu um leikinn: Valur 3 - 2 Breiðablik
Undanfarnar vikur hafa verið miklar umræður um framtíð Heimis Guðjónssonar í þjálfarastól Vals en liðið hafði tapað fjórum leikjum í röð fyrir landsleikjahlé sem hófst í lok síðasta mánaðar.
„Við tökum ábyrgð á þessu, eins og þjálfararnir og allir í kring. Það er ekki einn maður sem ber ábyrgð á þessu og við fórum út með karakter í dag og sýndum að það er mikill karakter í þessu liði. Þegar hlutirnir fara að ganga með okkur munum við verða hættulegir," sagði Aron.
Hann skoraði fyrsta markið í leiknum í kvöld, og hans fyrsta mark á Íslandsmótinu í sumar.
„Ég vann boltann af Damir, Blikarnir spila frábæran fótbolta og eru frábært lið en við vitum að þeir spila risky fótbolta. Anton var því svolítið framarlega svo það var bara að láta vaða. Ég er kominn á þann aldur að ég horfi frekar á frammistöðu hjá mér en mörk og finst ég hafa átt marga góða leiki þó það hafi ekki verið komin mörk. Það var samt frábært að hjálpa liðinu með marki."
Nánar er rætt við Aron í spilaranum að ofan.
