Óskar Hrafn segir KR vera lið í verkefni.
KR-ingar lutu í lægra haldi gegn Víking R. á Víkingsvelli fyrr í kvöld, lokatölur leiksins 3-2. Óskar Hrafn Þorvaldsson, þjálfari KR, segist vera ánægður með liðsframmistöðuna og telur KR hafa stýrt leiknum frá upphafi til enda.
Lestu um leikinn: Víkingur R. 3 - 2 KR
„Í ljósi þess hvernig leikurinn spilaðist er svekkjandi að tapa. Að sama skapi stend ég hérna á móti þér og hugsa um þennan leik og er feikilega stoltur af drengjunum. Við komum sennilega á erfiðasta útivöll á Íslandi og mér fannst við stjórna leiknum frá fyrstu mínútu til þeirra síðustu."
Hefði Karl Friðleifur átt að fá rautt spjald?
„Ef ég horfi á þetta út frá því sem ég er vanur. Ég átta mig ekki á tölfræðinni, eftir þennan leik er hún líklegast 99,93% fá rautt spjald af þeim sem verja boltann með hendinni inn í teig."
„Ég hef ekki séð þetta, ætla ekki að fara skoða þetta. Þetta hjálpar mér ekkert, ég verð bara að trúa þeim að þeir hafi hitt á rétta ákvörðun. En ákvörðunin var stór."
KR-liðið er í verkefni
„Við erum með 13 stig, tíu stigum á eftir Víking. Hefðum við unnið 1-0 iðnaðarsigur værum við í betri málum, en ekkert til að byggja ofan á. Þegar við erum í verkefni þá getur þú ekki reynt að stytta þér leið."
Hvar er KR statt í verkefninu?
„Það er erfitt að setja stoppistöð hvar við erum nákvæmlega, það sem ég veit er að við erum töluvert betri en í byrjun móts, til dæmis að stíga upp á andstæðinganna, betri að standa í línu, betri að leysa pressu."
„Ég met það sem svo að við erum komnir eitthvað áleiðis," segir Óskar og bætir við; „Við verðum að gera það á okkar forsendum eða kannski mínum forsendum, sem eru okkar forsendur í dag."
Viðtalið í heild sinni í spilaranum hér að ofan.
Athugasemdir
