Ágúst Gylfason.
Ágúst Gylfason, þjálfari Stjörnunnar, spjallaði við Fótbolta.net á kynningarfundi fyrir Bestu deildina í síðustu viku. Deildin hefst á morgun.
Stjarnan hefur reyndar ekki leik fyrr en á þriðjudaginn þegar liðið tekur á móti ÍA á heimavelli. Það verður fyrsti leikur Gústa með Stjörnuna í Bestu deildinni, en hann tók við liðinu eftir síðustu leiktíð.
„Staðan á leikmannahópnum er nokkuð góð. Við erum með stóran og breiðan hóp. Undirbúningstímabilið hefur gengið vel. Hópurinn er fjölbreyttur og við gætum stillt upp byrjunarliði í fyrsta leik bara með 2. flokks strákum sem hafa verið að æfa með okkur í allan vetur. Við gætum líka stillt upp byrjunarliði með leikmönnum sem eru 28 ára og eldri," sagði Gústi.
Hann var spurður að því hvort það yrði einhver hreyfing á hópnum áður en félagaskiptaglugginn lokar.
„Ég er ekki viss. Við erum með alla anga úti og erum að skoða heima og erlendis. Ef að rétti leikmaðurinn dettur inn, þá erum við tilbúnir að skoða það."
Stjarnan ætlar sér að vera í efri hlutanum þegar mótið skiptist upp eftir 22 leiki. „Við viljum vera í efri hlutanum en númer eitt, tvö og þrjú er að fá góða frammistöðu. Við viljum stilla hópnum vel saman og ná góðum úrslitum líka, að sjálfsögðu."
