„Upplifunin var auðvitað algjörlega geggjuð, eiginlega óraunveruleg og ólýsanleg. Við vorum Mið-Ísland strákarnir og sátum saman í stúkunni og táruðumst allir enda ekki annað hægt en að hrífast svona svakalega," sagði Björn Bragi einn af meðlimum Mið-Íslands.

„Þetta er eitthvað sem manni óraði ekki fyrir þegar maður var yngri að horfa á HM að Ísland myndi einhverntímann taka þátt og hvað þá að gera svona alvöru hluti. Þetta er í rauninni geggjað."

En hvernig leið honum þegar hann sá boltann í netinu hjá Alfreð Finnbogasyni?

„Eins og ég segi, óraunverulegt. En samt, maður hefur séð þetta svo marg oft áður. Á EM, að vinna England og vinna riðilinn í undankeppni HM og fara á HM. Maður er orðinn of góður vanur, en þetta var geggjað," sagði Björn Bragi sem segir liðið geta farið alla leið.

„Þeir geta orðið Heimsmeistarar ef þeir vilja það. Þeir geta allt, það er bara þannig."

Eins og fyrr segir skemmti Mið-Íslands hópurinn fyrir strákana okkar í kvöld. Björn Bragi neitar því ekki að þeir hafi aðeins gert grín af strákunum í landsliðinu.

„Á hótelinu með þeim með engar myndavélar þá létum við þá alveg aðeins heyra það. Þetta eru menn með húmor fyrir sér þannig þeir höfðu gaman af því þegar við vorum að skjóta aðeins á þá. Þetta var mjög skemmtileg og mikil stemning. Við vorum auðvitað þvílíkt spenntir fyrir því að gera þetta og gaman að sjá hversu mikið þeir voru peppaðir."

Viðtalið í heild sinni við Björn Braga má sjá í sjónvarpinu hér að ofan.