Bravo ólst upp hjá Barcelona og skipti til Bayer Leverkusen sumarið 2021. Þar varð hann yngsti leikmaður sögunnar til að spila keppnisleik fyrir Leverkusen, met sem stóð aðeins í nokkrar mínútur þar til yngri liðsfélagi hans kom inn af bekknum.

Bravo var hjá Leverkusen í eitt ár og á þessu ári skoraði hann 10 mörk í 15 landsleikjum með U17 liði Spánverja. Honum leið ekki vel í Þýskalandi og var því lánaður til Real Madrid sumarið 2022.

Bravo hefur verið hjá Real í tvö ár og leikið með varaliði félagsins, en ákveðið var á dögunum að kaupa ekki táninginn þar sem Real gat ekki lofað honum hlutverki með aðalliðinu.

Bravo er 19 ára gamall og á eitt mark í tólf leikjum með U19 landsliði Spánverja. Hann á þrjú ár eftir af samningi sínum hjá Leverkusen en hann vill helst vera áfram á Spáni.

„Ég er að leita að verkefni þar sem ég get fengið mikilvægt hlutverk í liðinu. Ef ég stend mig nægilega vel næstu tvö til þrjú árin þá get ég kannski snúið aftur til Real Madrid," segir Bravo.

„Núna eru Mbappé, Vini, Rodrygo og Jude allir í liðinu svo það er ekkert pláss fyrir leikmenn úr akademíunni."