Betur fer en á horfðist þegar Hörður Björgvin Magnússon meiddist á hné í leik með Bristol City um síðustu helgi. Hörður er mættur til móts við landsliðið hér í Bandaríkjunum.
„Þetta leit ekki vel út þegar það gerðist. Eftir að hafa farið í skanna og rætt við sérfræðing leit þetta strax betur út. Það er rosalega gott að vera kominn hingað í meðferð hjá okkar sjúkrateymi. Það er líka gott að geta talað íslensku aðeins," segir Hörður.
Ísland mætir Mexíkó á föstudagskvöld og leikur svo gegn Perú í næstu viku. Hörður æfði ekki í dag en mun hann spila þessa vináttuleiki?
„Ég hreinlega veit það ekki. Það er undir þjálfurunum og sjúkrateyminu hvað planið er. Við erum ekkert að flýta okkur neitt, við viljum vera heilir fyrir sumarið. Ég kom hingað í gær en vonast til að vera með á æfingu á næstu dögum."
Þegar Hörður meiddist um helgina hugsaði hann strax út í HM.
„Auðvitað kemur smá hræðsla varðandi HM, þetta er það stærsta sem maður mun upplifa. Það var gott að fá að góðar upplýsingar og fékk að vita að meiðslin væru ekki alvarleg."
Sjáðu viðtalið í heild í sjónvarpinu hér að ofan.
Athugasemdir