Er Íslandsmeistaratitillinn farinn?
Kristján Guðmundsson, þjálfari Stjörnunnar.
„Við erum mest svekkt með það hvað við vorum dauft lið inn á vellinum," sagði Kristján Guðmundsson, þjálfari Stjörnunnar, eftir 2-1 tap gegn botnliði Selfoss í Bestu deild kvenna í kvöld.
„Það var lítill talandi og lítil hvatning, og einnig færðist boltinn mjög hægt inn á vellinum."
„Það var lítill talandi og lítil hvatning, og einnig færðist boltinn mjög hægt inn á vellinum."
Lestu um leikinn: Selfoss 2 - 1 Stjarnan
Er einhver ástæða fyrir þessum daufleika?
„Ég get ekki alveg svarað fyrir það af hverju við vorum ekki meira peppað lið inn í leikinn. En það var erfitt að spila á vellinum, upp á að reyna að spila hratt. Þess vegna voru spilkaflarnir ekki fleiri og betri. Varðandi hausinn, þá er eitthvað sem við náum ekki að gíra okkur upp í," segir Kristján.
„Við öll sem erum í þessu, við berum ábyrgð á þessu. Auðvitað eigum við að vera gíraðari í þetta verkefni, miklu tilbúnari. Ég veit ekki hvað það er sem hefur áhrif."
Stjarnan skoraði 45 mörk í fyrrasumar, en hefur aðeins gert níu mörk í fyrstu níu leikjunum í sumar.
„Það eru ekki alveg sömu leikmenn sem eru að spila, bæði frá upphafi móts og svo núna. Það er fyrst og fremst það. Það koma öðruvísi hlaup og öðruvísi taktur. Með nýjum leikmönnum og aðeins breyttri uppstillingu koma öðruvísi hlaup og öðruvísi týpur af leikmönnum inn í liðið. Það hefur breyst aðeins hvernig við erum að spila en það á að vera að gefa meira en það er að gefa núna. Það hefur gert það inn á milli, en ekki nægilega stöðugt."
Stjörnunni var spáð Íslandsmeistaratitlinum fyrir tímabilið, en liðið hefur alls ekki verið að spila þannig.
„Við vitum hvað þarf til að vinna leiki og vera gott lið. Við þurfum að vera duglegri að minna okkur á hvað við þurfum að gera til að vinna leikina. Við þurfum að mæta tilbúnari og vilja vinna öll verkefni. Það er ekki áskrift að neinum sigrum, þú þarft að hafa fyrir þessu öllu saman," sagði Kristján en er Íslandsmeistaratitillinn farinn?
„Eins og staðan er núna erum við fjórum leikjum frá efsta sætinu. Það er töluvert mikið. Það fjarlægist en á meðan það er tölfræðilegur möguleiki að við getum farið þarna upp þá stefnum við á það. Við þurfum nánast að vinna hvern einasta leik sem eftir er miðað við hvernig deildin hefur spilast."
Allt viðtalið má sjá í spilaranum hér fyrir ofan.
