„Það hreinlega gerist ekki klaufalegra!!! Gummi Kri sendir boltann til baka á Atla Gunnar í markinu og hann tekur svo rosalega þunga snertingu að hann gefur boltann hreinlega á Kaj Leo sem krullar svo boltann framhjá honum. Nú hljóta FH-ingar að sakna Gunnars Nielsen," skrifaði Haraldur Örn Haraldsson í textalýsingu frá leiknum þegar ÍA komst yfir.

Eiður Smári Guðjohnsen, þjálfari FH, sagði í viðtali eftir leikinn að Gunnar yrði mögulega frá í viku til tíu daga. Hann verður því væntanlega ekki með FH í leik gegn ÍR í 16-liða úrslitum Mjólkurbikarsins en ætti að vera klár fyrir næsta deildarleik, gegn Stjörnunni þann 4. júlí.

FH jafnaði á Skaganum í gær og 1-1 urðu lokatölur. Hafnarfjarðarliðið er án sigurs í fjórum síðustu deildarleikjum og situr í níunda sæti Bestu deildarinnar. Ólafur Jóhannesson var rekinn í síðustu viku vegna lélegs árangurs liðsins.