Franska félagið Marseille ætlar sér stóra hluti á komandi leiktíð og er búið að krækja í tíu leikmenn í sumar.
Luis Suarez og Jonathan Clauss voru að bætast við listann en Suarez kemur úr röðum Granada þar sem hann skoraði 8 mörk og lagði upp 4 er liðið féll á síðustu leiktíð.
Suarez er 24 ára gamall Kólumbíumaður með fjóra A-landsleiki að baki. Marseille borgar 10 milljónir evra fyrir hann.
Clauss er hægri vængbakvörður sem hefur leikið fjóra landsleiki fyrir Frakkland á þessu ári. Hann er 29 ára gamall og átti frábært tímabil með Lens á síðustu leiktíð.
Hann vakti meðal annars áhuga frá Manchester United en Marseille endaði á að festa kaup á honum fyrir 8 milljónir evra.
Marseille er einnig búið að kaupa Cengiz Ünder frá Roma eftir að hafa verið á láni hjá félaginu á síðustu leiktíð. Sömu sögu má segja um Pau Lopez, Arkadiusz Milik og Matteo Guendouzi sem koma fyrir rétt rúmlega 10 milljónir á haus frá Roma, Napoli og Arsenal.
Þar að auki er Marseille sagt hafa haft betur í kapphlaupi við Manchester City um varnarmanninn Isaak Toure. Þá er Chancel Mbemba, sem enginn veit hvað er gamall, kominn til félagsins á frjálsri sölu.
Ruben Blanco kemur á láni frá Celta og mun berjast við Paul Lopez um markmannsstöðuna og að lokum er miðvörðurinn Samuel Gigot kominn frá Spartak Moskvu eftir að hafa verið á láni í Frakklandi í vor.
