„Þetta var alltaf að fara að vera erfitt miðað við þá stöðu sem við erum í en mér fannst stelpurnar gera þetta vel svona að mestu leyti. Þær voru skiljanlega svolítið stressaðar á köflum og það sást á leik okkar en það var gaman að sjá þegar þær tóku boltann og náðu að spila honum á milli. Ég get ekkert sett út á vinnuframlagið. Þetta var allt í lagi miðað við aðstæður,“ sagði Nik Chamberlain, þjálfari Þróttar, eftir 5-0 tap gegn Blikum í kvöld.
Lestu um leikinn: Breiðablik 5 - 0 Þróttur R.
Þróttarar voru í vandræðum vegna meiðsla og leikbanna fyrir leik og ekki skánaði ástandið þegar Friðrika Arnardóttir, markvörður, þurfti að fara útaf snemma leiks. Í hennar stað kom Agnes Þóra Árnadóttir en hún var ræst út á síðustu stundu og var því ekki einu sinni á leikskýrslu fjölmiðlamanna. Þar að auki lék hún í Breiðablikstreyju merktri Telmu Ívarsdóttur.
„Frikka var búin að vera veik og henni versnaði þegar leið á daginn. Hún var svo komin með hita þegar hún mætti. Við ræstum Agnesi Þóru því út á síðustu stundu. Hún stóð sig frábærlega,“ sagði Nik um markmannsskiptin.
Hann vildi ekki velta sér um of upp úr tapinu og segir að það muni ekki hafa áhrif á sjálfstraust leikmanna sinna.
„Svona er þetta bara. Þetta er einn af þessum leikjum þar sem maður býst fyrirfram ekki endilega við að fá eitthvað út úr. Stelpurnar lögðu sig fram og með alla þessa leikmenn fjarverandi eru 5-0 ekkert hrikalegar tölur. Við leggjum þennan leik bara frá okkur og gefum þeim hörkuleik á okkar heimavelli í seinni umferðinni.“
Hægt er að horfa á allt viðtalið við Nik í spilaranum hér að ofan.
Athugasemdir