Svissneski varnarmaðurinn Kevin Mbabu er skrefi nær því að ganga í raðir Fulham frá þýska félaginu Wolfsburg.
Mbabu, sem er 27 ára gamall, hefur verið með bestu hægri bakvörðum þýsku deildarinnar síðustu þrjú ár, en snýr nú aftur í ensku úrvalsdeildina.
Hann spilaði fimm leiki á fjórum árum sínum með Newcastle United frá 2013 til 2017.
Fulham hefur náð samkomulagi um kaup á Mbabu og mun hann kosta félagið 6,5 milljónir punda. Hann hélt í læknisskoðun hjá Fulham í æfingabúðum liðsins í Portúgal um helgina og stóðst hana og má því búast við tilkynningu frá enska félaginu á næstu dögum.
Enska félagið mun einnig staðfesta eins árs samning við ísraelska sóknarmanninn Manor Solomon sem kemur frá úkraínska félaginu Shakhtar Donetsk.
Athugasemdir