Brynjar Björn: Teljum okkur vera með gott lið til að halda sætinu

„Það er gott að það er stöðugleiki hjá ykkur fjölmiðlamönnum í þessum spám," segir Brynjar Björn Gunnarsson, þjálfari nýliða HK. Kópavogsliðinu er alls staðar spáð neðsta sætinu.

„Markmiðið er áframhaldandi vera í deildinni að ári. Við teljum okkur vera með gott lið til þess. Við förum brattir í þetta mót og höfum undirbúið okkur vel þó úrslit hafi ekki dottið með okkur í vetur. Við komum klárir og í fullri ferð inn í mótið."

Margir leikmanna HK hafa ekki sannað sig í efstu deild.

„Leikmenn fara hungraðir inn í mótið. Það eru góðir leikmenn þarna sem hafa ekki spilað eða spilað lítið í efstu deild. Þetta er kjörið tækifæri fyrir þá að taka það tækifæri."

Mikið er talað um Kórinn þegar rætt er um HK. Hversu mikið vopn er Kórinn fyrir HK-inga?

„Ekki meira vopn en það að þetta er okkar heimavöllur. Okkur gekk vel á heimavelli í fyrra og við ætlum að halda því þannig að það verði okkar stærsta vígi."

HK byrjar Pepsi Max-deildina með leik gegn FH á laugardaginn í Kaplakrika.