Fram er fallið úr leik í Mjólkurbikarnum eftir 4-1 tap gegn KA á Akureyri í dag. Jón Sveinsson þjálfari liðsins var til viðtals hjá Fótbolta.net eftir leikinn. Hvernig er tilfinningin?
Lestu um leikinn: KA 4 - 1 Fram
„Ömurleg í sjálfum sér, við ætluðum að halda áfram í bikarnum og fara lengra en hingað. Þetta er niðurstaðan og við verðum að sætta okkur við það og áfram gakk,"
Fram var tveimur mörkum undir og manni færri allan síðari hálfleikinn en náðu að minnka muninn.
„Það var á brattann að sækja fyrir okkur. Menn lögðu sig fram, það er ekki hægt að kvarta yfir því. Menn hlupu og börðust. Við vorum einum færri, þetta er bikarkeppni, við höfum engu að tapa þannig að við urðum að reyna sækja og jafna leikinn til að fá eitthvað út úr honum," sagði Jón.
Framarar söfnuðu nokkrum gulum spjöldum og leikmaður fékk rautt af bekknum.
„Menn voru ósáttir. Rauða spjaldið var bara leikmaður á bekknum sem stökk upp að mótmæla dómi."
Jón var ósáttur við annað vítanna sem KA fékk í leiknum.
„Mér fannst fyrra vítið ekki vera víti, þar er Óli á undan í boltann og sparkar honum í burtu svo lenda þeir saman. KA maðurinn fer í hann en ekki öfugt. Ég held að við getum ekki kvartað yfir seinna vítinu."
„Á móti áttum við að fá víti í fyrri hálfleik þar sem brotið var fært útfyrir teig þar sem brotið var klárlega inn í teig. Ég held að það hafi allir séð það nema tveir menn á vellinum."
