Það er mikið um að vera í Þjóðadeildinni í dag þar sem tveir úrslitaleikir eru á dagskrá í A-deild og fjórir í B-deild.
Í A-deild keppast nágrannaþjóðirnar Portúgal og Spánn um toppsætið í riðli 2. Þar er Portúgal með tveggja stiga forystu fyrir úrslitaleikinn gegn Spáni sem fer fram í Braga, Portúgal.
Sigurvegarinn tryggir sér farmiða í úrslitakeppni Þjóðadeildarinnar á næsta ári, ásamt Ítalíu, Hollandi og Króatíu.
Þá er einnig úrslitaleikur um þriðja sætið þar sem Tékkland þarf sigur á erfiðum útivelli til að bjarga sér frá falli niður um deild. Tékkar heimsækja Svisslendinga sem fóru illa af stað eru komnir í góða stöðu eftir óvænta sigra gegn Portúgal og Spáni í síðustu umferðum.
Sviss er með sex stig og Tékkland fjögur og því þurfa Tékkar sigur til að bjarga sér.
Þá eru úrslitaleikir í B-deildinni þar sem Ísland á til að mynda leik við Albaníu en það er eina viðureignin sem er ekki úrslitaleikur. Noregur á úrslitaleik við Serbíu um toppsæti riðils 4 á meðan Úkraína tekur á móti Skotlandi í úrslitaleik riðils 1.
Norðmenn og Serbar eru jafnir á stigum en Skotar eiga tveggja stiga forskot á Úkraínu. Því þurfa stríðshrjáðir heimamenn, sem munu spila leikinn í Kraká, Póllandi, að sigra til að tryggja sig í úrslitakeppnina og upp um deild.
Svíar þurfa þá sigur á heimavelli gegn Slóveníu til að falla ekki niður í C-deild á meðan Írum nægir jafntefil gegn Armeníu.
Að lokum er komið að C-deildinni þar sem Grikkland er búið að tryggja sér toppsætið en Norður-Írland, Kósovó og Kýpur eru í fallbaráttu.
A-deild:
18:45 Portúgal - Spánn
18:45 Sviss - Tékkland
B-deild:
18:45 Írland - Armenía
18:45 Úkraína - Skotland
18:45 Albanía - Ísland
18:45 Noregur - Serbía
18:45 Svíþjóð - Slóvenía
C-deild:
18:45 Grikkland - Norður-Írland
18:45 Kósovó - Kýpur