Davíð skrifaði undir þriggja ára samning við Íslands- og bikarmeistara Víkings eftir erfitt tímabil með Blikum þar sem hann var mikið frá vegna meiðsla.

Hann fékk á sig nokkra gagnrýni fyrir nokkrum vikum síðan þegar hann mætti á bikarúrslitaleikinn sem stuðningsmaður Víkinga - á meðan hann var hann enn leikmaður Breiðabliks. Víkingur og Breiðablik börðust af krafti um Íslandsmeistaratitilinn og endaði það með sigri Víkinga, nokkrum vikum fyrir bikarúrslitin.

Hann var spurður út í þessa umræðu þegar hann var kynntur sem nýr leikmaður Víkinga í gær.

„Það er leiðinlegt að einhver hafi tekið það nærri sér, að ég hafi mætt og setið Víkingsmegin á þessum bikarúrslitaleik. Þeir sem ég talaði við í mínu nærumhverfi - vinir, fjölskylda, leikmenn í liðinu og þjálfararnir hjá Breiðabliki - þeim var alveg sama. Ég skýrði mál mitt og það skildu mig allir," sagði Davíð.

„Ég endaði þetta á góðum nótum hjá Breiðablik sem mér finnst mjög mikilvægt."

Hægt er að horfa á allt viðtalið hér að neðan.