Torino er búið að festa kaup á ítalska sóknarmanninum Pietro Pellegri frá AS Mónakó.
Hinn 21 árs gamli Pellegri þótti gífurlega mikið efni á sínum tíma og var byrjaður að spila með Genoa í Serie A fyrir sextánda afmælisdaginn.
Mónakó borgaði um 25 milljónir evra til að kaupa Pellegri frá Genoa þegar hann var ekki enn orðinn 17 ára en þá hafði Pellegri skorað 3 mörk í 9 leikjum í Serie A.
Pellegri kom aðeins við sögu í nokkrum leikjum fyrstu árin hjá Mónakó og settu tíð meiðslavandræði strik í reikninginn. Í fyrra fékk hann loks tækifæri til að spreyta sig en skoraði aðeins einu sinni í sautján leikjum og var því lánaður út til Ítalíu á síðustu leiktíð.
Pellegri kom við sögu sex sinnum með AC Milan á fyrri hluta tímabils og skoraði svo eitt mark í níu leikjum með Torino eftir áramót.
Torino ákvað að festa kaup á Pellegri en nýtti þó ekki ákvæðið í lánssamningnum sem hljóðaði upp á 7 milljónir evra. Torino tókst að lækka verðið niður í 5 milljónir samkvæmt The Guardian.
Pellegri skoraði aðeins þrisvar í 32 leikjum með yngri landsliðum Ítalíu og á einn A-landsleik að baki fyrir þjóð sína. Hann kom inn af bekknum í 4-0 sigri í æfingaleik gegn Eistlandi.
Pellegri er búinn að skrifa undir fjögurra ára samning við Torino.
𝓣𝓸 𝓫𝓮 𝓬𝓸𝓷𝓽𝓲𝓷𝓾𝓮𝓭... pic.twitter.com/kLnq1NxIlI
— Torino FC English (@TorinoFC1906_En) June 28, 2022