Sandra hélt hreinu í lokaleiknum
„Ég verð að viðurkenna að þetta var sterkt. Þetta var það sem við ætluðum og það er fínt að fara með þetta inn í frí,“ sagði Sandra Sigurðardóttir, markvörður Vals, sem var best á vellinum þegar lið hennar varð fyrsta liðið í tvö ár til að vinna Breiðablik í deildarleik.
Lestu um leikinn: Valur 1 - 0 Breiðablik
Valsarar voru aðallega að spila upp á stoltið í dag enda hefðu þær þurft að valta yfir besta varnarlið deildarinnar til að komast upp fyrir þær og í 2.sætið. Sandra segir að það hafi ekki verið erfitt að mótivera sig fyrir leikinn.
„Nei, nei. Við bjuggum bara til okkar eigin keppni og settum þetta upp sem úrslitaleik fyrir okkur og við kláruðum hann. Mér þykir það mjög sterkt á móti mjög sterku liði Breiðabliks.“
„Það var smá hiti í þessu og þetta var spennandi. Mér fannst við falla óþarflega aftarlega og við þorðum ekki að halda boltanum í seinni hálfleik. Annars bara leystum við þetta.“
Blikar sóttu meira í leiknum en Sandra stóð vaktina af stakri prýði og var ánægð með sína frammistöðu.
„Ég hélt hreinu og liðið allt þannig að ég verð að vera sátt.“
Að lokum spurðum við Söndru hvort hún væri ánægð með fótboltasumarið heilt yfir.
„Bæði og. Auðvitað vildum við vera ofar en það er margt jákvætt sem við getum tekið með út úr þessu tímabili. Bæði sem lið og sem einstaklingar. Ég sjálf er sátt við helling en ekki allt hinsvegar en það fer bara í lærdómspokann.“
Athugasemdir
