Sigurður Víðisson mættur í Fjölnisgallann í gær.
,,Ég er mjög spenntur, þetta er skemmtilegt verkefni," sagði Sigurður Víðisson við Fótbolta.net í gær eftir að hafa skrifað undir samning um að þjálfa kvennalið Fjölnis í 1. deildinni næsta sumar.
Sigurður stýrði HK/Víkingi á síðustu leiktíð og kom liðinu upp í efstu deild eftir sigur í umspili við Fjölni sem hann tekur núna við. En hvernig líst honum á liðið?
,,Ég sá tvo leiki í sumar, þessa tvo leiki sem við spiluðum við þær. Þetta er flott lið og risaklúbbur. Við eigum að koma þeim upp í úrvalsdeild og vera þar."
Liðið er alveg nægilega gott til að fara upp. við vinnum í vetur og sjáum til. Ég á ekki von á að styrkja liðið, við ætlum að spila á okkar mannskap eins og er."
Sigurður kom HK/Víkingi upp úr 1. deildinni og vildi halda áfram með liðið en félagið ákvað að skipta um þjálfara.
,,Þeir tóku ákvörðun, ekki ég, svo þú verður að ræða við þá um það. En ég er ekkert að grenja það, það þýðir ekki. Ég hefði viljað fara upp í úrvalsdeild og spila þar og standa okkur vel. En það er bara búið."
Theódór Sveinjónsson sem þjálfaði hitt liðið sem fór upp, Þrótt, var látinn taka pokann sinn eftir mótið svo báðir nýliðarnir skiptu um þjálfara. Sigurður grínaðist um ákvæði í samningi sínum um að hann yrði látinn fara ef liðið færi upp.
,,Gárungarnir segja að maður verði rekinn ef maður fer upp. Það kemur bara í ljós, ég vona ekki. Við förum bara upp og sjáum til."
