Alexis Sanchez skoraði 20 mörk í 109 leikjum hjá Inter, komandi nánast alltaf inn af bekknum.
Alexis Sanchez er búinn að semja við Inter um starfslok þar sem ítalska félagið hefur unnið að því í allt sumar að losna við hann af launaskrá.
Sanchez átti eitt ár eftir af samningnum við Inter og samþykkti starfslok vegna aukins áhuga frá Marseille.
Sanchez, sem verður 34 ára í desember, braust fram í sviðsljósið með Udinese í ítalska boltanum og lék síðan fyrir Barcelona, Arsenal og Manchester United áður en hann skipti til Inter.
Hann er goðsögn í heimalandi sínu Síle og leikur enn fyrir nokkuð aldrað landslið sem náði mögnuðum árangri þegar Sanchez og félagar voru upp á sitt besta.
Það hefur verið mikil endurbygging í gangi hjá Marseille undanfarin misseri og er félagið búið að festa kaup á þónokkrum leikmönnum í sumar.
Athugasemdir
