Franski varnarmaðurinn Samuel Umtiti er á leið aftur til heimalandsins en hann verður lánaður frá Barcelona til Rennes út leiktíðina.
Umtiti, sem er 28 ára gamall, spilaði aðeins einn leik fyrir Barcelona á síðustu leiktíð.
Hann missti af þrettán leikjum vegna meiðsla, var tvisvar utan hóps, en annars sat hann meira og minna á varamannabekknum.
Franski varnarmaðurinn samþykkti launalækkun í janúar til þess að Barcelona gæti skráð Ferran Torres í hópinn en nú er hann á förum frá félaginu.
Xavi ákvað að taka hann ekki með í æfingaferð liðsins og því ljóst að hann er ekki í plönum þjálfarans.
Spænskir fjölmiðlar segja að hann sé nálægt því að ganga í raðir franska félagsins Rennes á láni út tímabilið, með möguleika á að kaupa hann. Félögin ræða nú sína á milli hvernig skal greiða laun hans áður en Umtiti fer til Frakklands.
Umtiti kom til Barcelona frá Lyon fyrir sex árum fyrir um það bil 25 milljónir evra.
Athugasemdir
