Englandsmeistarar Liverpool ætla að styrkja sig í sumarglugganum en félagið hefur haft samband við Ismaila Sarr, leikmann Watford, en það er Watford Observer sem greinir frá þessu í dag.
Þessi 22 ára gamli leikmaður var einn af björtu punktunum í leik Watford á síðasta tímabili en liðið féll niður um deild í lokaumferðinni.
Gengi liðsins var afar slakt eftir að deildin fór aftur af stað og tókst Aston Villa að bjarga sér frá falli.
Mikill áhugi er á Sarr, sem skoraði 5 mörk og lagði upp 6 í deildinni á tímabilinu en hann var sérstaklega öflugur er Watford gerðist fyrsta liðið til að vinna Liverpool í deildinni. Hann gerði tvö mörk í leiknum.
Samkvæmt Watford Observer þá hefur Liverpool haft samband við umboðsmann Sarr en ljóst er að það verður barist um þennan öfluga vængmann í glugganum.
Watford keypti Sarr frá Rennes í Frakklandi fyrir metfé á síðasta ári en félagið greiddi 30 milljónir punda fyrir hann.
Athugasemdir