Skagamenn eru nánast búnir að bjarga sér frá falli úr Bestu deildinni eftir flottan sigur gegn sterku liði ÍBV í Vestmannaeyjum í dag.
Lestu um leikinn: ÍBV 0 - 2 ÍA
Lárus Orri Sigurðsson þjálfari var mjög hress að leikslokum en gengi ÍA hefur verið ótrúlegt undir hans stjórn. Þetta var fimmti sigur liðsins í röð í deildinni.
„Þegar við vorum á okkar lægsta punkti á tímabilinu tókum við langan fund hérna í búningsklefanum og ákváðum að snúa bökum saman. Við ákváðum að ef það væri eitthvað sem við ætluðum að skilja eftir í þessari deild þá væri það að sýna það að við gæfum allt í alla leiki og við höfum bara byggt á því síðan þá," sagði Lárus Orri í viðtali við Tryggva Guðmundsson að leikslokum.
„Þetta er ekki alveg komið en við erum komnir í góða stöðu. Góð spilamennska hélt áfram í dag, strákarnir voru að berjast fyrir hvorn annan og þeir lögðu sig gríðarlega mikið fram. Þeir hafa líka sýnt það í undanförnum leikjum að þeir eru alls ekki slæmir í fótbolta."
Það var mikill vindur í Eyjum þegar leikurinn fór fram en bæði Skagamenn og Vestmanneyingar eru vanir menn.
„Að koma til Vestmannaeyja og vinna ÍBV í roki í Eyjum er bara frábært."
