The Times greinir frá því að starf Ange Postecoglou hjá Nottingham Forest sé í hættu ef liðið tapar í Newcastle á morgun.
Forest hefur farið hrikalega illa af stað undir stjórn Postecoglou og er komið með fjögur töp og tvö jafntefli í sex leikjum. Síðasta tapið kom í miðri viku á heimavelli gegn danska liðinu FC Midtjylland.
Evangelos Marinakis eigandi Forest vill sjá breytingar á árangri liðsins strax, annars getur Postecoglou búist við því að vera rekinn.
Ástralinn hefur aðeins verið 25 daga í starfi hjá Forest og gæti bætt úrvalsdeildarmet ef hann verður rekinn á næstu tveimur vikum. Hann yrði þá sá þjálfari sem entist styst í starfi í sögu deildarinnar.
Les Reed á metið sem stendur eftir að hafa verið rekinn 41 degi eftir að hafa verið ráðinn sem aðalþjálfari hjá Charlton Athletic tímabilið 2006-07.
Leikurinn gegn Newcastle er sá síðasti fyrir landsleikjahlé en Forest tekur svo á móti Chelsea 18. október, 39 dögum eftir ráðninguna á Postecoglou.
Postecoglou var rekinn úr þjálfarastöðunni hjá Tottenham undir lok síðustu leiktíðar þrátt fyrir að hafa unnið Evrópudeildina.
Athugasemdir
