Heimild: Íþróttavikan 

Jökull er yngri bróðir Axels Óskars Andréssonar og er Jökull grjótharður KR-ingur á þessu tímabili.

Axel hefur fengið mikla gagnrýni í sumar eftir að miklar væntingar voru gerðar til hans við komuna úr atvinnumennsku. KR hefur átt mikið vonbrigðatímabili. Jökull var spurður hvort hann héldi að það væri hægt að plata Axel í uppeldisfélagið, Aftureldingu, í vetur.

„Ef ég væri á leiðinni (í Aftureldingu) þá myndi ég grátbiðja hann. Ég hef alltaf verið yngri krúttlegi bróðirinn og ég myndi gjörsamlega suða í honum. Auðvitað erum við aðeins búnir að tala um það, ræða hvað við myndum þurfa og hvað myndi þurfa að gerast. Ég ætla ekki að ljúga, það væri ekki leiðinlegt (að spila með honum). Eina sem ég er að pæla er hversu oft við myndum rífast á dag. Það er kannski svona eina brekkan. En djöfull væri það gaman," sagði Jökull.

Hann var svo spurður hvort það hafi verið erfitt að horfa á KR og bróður sinn í sumar.

„Ég ætla reyna tala um þetta án þess að gráta. Áður en Axel fór í KR þá hafði ég aldrei þannig séð fylgst með KR, en ég er í dag grjótharðasti KR-ingur á jörðinni. Þegar bróðir þinn er að spila þá tekur einhver djöfull yfir þig, sérstaklega núna með þeirra tímabil, þetta er svo erfitt. Bróðir minn er búinn til úr steinum, þú 'fokkar' ekki í honum. Hann tekur þetta á bakið, upp með bringuna og ekkert bull."

„Hann er búinn að fá mikinn hita, sem þeir sem eru að koma erlendis frá fá kannski meira af. Ég þekki bróður minn og veit að hann verður svo milljón sinnum betri leikmaður eftir þetta og betri andlega," sagði Jökull.