Íslenska liðið fær ekki að vita það fyrr en síðar í dag hver andstæðingurinn verður, en stelpurnar okkar mæta sigurliðinu úr leik Belgíu og Portúgal á eftir.

„Það er mjög gaman (að vera komin aftur til móts við hópinn), við erum allar mjög spenntar fyrir þessu og mjög gaman að hitta alla," segir Áslaug Munda í samtali við KSÍ TV.

„Þetta er öðruvísi, það er svolítið skrítið að geta ekki undirbúið sig strax, skrítið að vita ekki á móti hverjum þú ert að fara að spila eða hvar. Þá skiptir máli að vera vel einbeitt þegar við fáum að vita það og byrja strax."

Áslaug Munda er í einum virtasta háskóla í heimi, Harvard í Bandaríkjunum. Hún spilar þar með skólaliðinu en tímabilið hefur farið vel af stað hjá þeim.

„Okkur er búið að ganga vel. Við vorum ósigraðar þangað til í fyrradag. Þetta er búið að vera mjög gaman og það hefur gengið ágætlega persónulega," segir Áslaug Munda sem kemur til með að vera í eldlínunni gegn annað hvort Belgíu eða Portúgal þann 11. október. Hún byrjaði tvo síðustu leiki Íslands í vinstri bakverðinum.