Íslenska U21 landsliðið gerði jafntefli gegn Eistlandi ytra í undankeppni EM 2027 í dag. Fótbolti.net ræddi við Ólaf Inga Skúlason, þjálfara liðsins, eftir leikinn.
Lestu um leikinn: Eistland U21 1 - 1 Ísland U21
„Miðað við hvernig staðan var á 37. mínútu þegar við fáum rauða spjaldið og fáum mark á okkur í kjölfarið úr aukaspyrnu þá er ég nokkuð sáttur," sagði Ólafur Ingi.
Þrátt fyrir að vera manni færri var Ísland með yfirhöndina í seinini hálfleik, liðið náði að jafna metin og hefði hæglega getað skorað sigurmarkið.
„Á sama tíma var þetta algjörlega ótrúleg frammistaða hjá strákunum í síðari hálfleik. Við erum einum færri og þeir komast varla yfir miðju. Við fáum tækifæri undir lokin til að klára þetta. Af því leytinu til er ég svekktur fyrir okkar hönd því mér fannst við eiga meira skilið og við vorum algjörlega frábærir í dag."
„Menn voru orðnir þreyttir og markmaðurinn þeirra á algjörlega frábæran leik, ver frá Hinrik og Benó undir lokin og heldur þeim inn í þessu. Þeir áttu ekki breik í okkur í seinni hálfleik. Ég er ótrúlega stoltur af frammistöðunni og stoltur af strákunum hvað þeir lögðu mikið í þetta."
„Tók okkur smá tíma að komast í takt við þetta, fáum á okkur færi eftir 10-15 mínútur. Mér fannst það vera það sem olli því að við stigum upp. Mér fannst við vera betri aðilinn frá því augnabliki og fram að þessu seinna gula spjaldi sem var fyrir mér glórulaus dómur," sagði Ólafur Ingi um fyrri hálfleikinn.
Júlíus Mar Júlíusson var rekinn af velli þegar hann fékk sitt annað gula spjald fyrir litlar sakir.
„Mér finnst þetta vera 'soft' á þessu getustigi. Þetta eru tvö brot, annað úti við hliðarlínu og svo er þetta eitthvað klafs. Mér fannst þetta persónulega ekki neitt,"
Mark Eista kom úr aukaspyrnu. Lúkas Petersson, markvörður Íslands, var í boltanum en náði ekki að halda honum réttu megin við línuna.
„Ef Lúkas hefði getað tekið það þá hefði hann tekið það. Hann er algjörlega frábær markmaður. Ég á eftir að skoða þetta aðeins betur, ég vona að strákarnir hafi hoppað í veggnum annars læt ég þá heyra það fyrir það."
Ísland er aðeins með eitt stig eftir tvo leiki en liðið tapaði gegn Færeyjum í fyrstu umferð. Ólafur Ingi er ekki búinn að leggja árar í bát.
„Við erum ekki þar. Auðvitað ætluðum við að vera með fleiri stig eftir þessa tvo leiki. Stundum þróast þetta í þessa átt, auðvitað er það ólíklegra. Eins og við sýndum í seinni hálfleik þá erum við ótrúlega öflugt og gott lið. Við eigum ennþá töluvert inni. Við erum pínu óheppnir núna, þau færi sem önnur lið eru að skapa gegn okkur eru gjafir frá okkur. Við þurfum að þurrka það upp. Það eru allir svekktir að við séum ekki með fleiri stig en við getum unnið hvaða lið sem er."
