Leikmenn eins og Tarik Ibrahimagic, Matthías Vilhjálmsson, Viktor Örlygur Andrason og jafnvel Stígur Diljan Þórðarson geta komið inn á miðsvæðið og spilað með þeim Daníel Hafsteinssyni, Gylfa Þór Sigurðssyni og svo Pablo Punyed þegar hann snýr til baka úr sínum hnémeiðslum. Svo er Valdimar Þór Ingimundarson einnig frábær í hlutverki sóknarsinnaðs miðjumanns en hann lék sem fremsti maður gegn ÍBV. Allt eru þetta gæðaleikmenn, enginn af þeim jafngóður og Aron, en þó rúmlega brúkhæfir í Bestu deildinni.

Fótbolti.net kannaði möguleikann á því hvort Víkingur gæti kallað Daða Berg Jónsson til baka úr láni frá Vestra en það er ekki hægt fyrr en í fyrsta lagi í sumarglugganum. Daði er U19 landsliðsmaður sem er ætlað stórt hlutverk hjá Vestra.

Utan frá eru því kostirnir margir, en ef það á að færa Viktor Örlyg, sem hefur spilað á kantinum í síðustu leikjum, aftur miðsvæðis, þá gæti Víkingur aftur farið og kannað möguleikana á því að fá kantmann inn í hópinn.

Víkingur hefur reynt að fá Kjartan Kára Halldórsson í vetur og eftir viðræður við FH ættu Víkingar að vita nákvæmlega hvað hann kostar. Þá hafði Víkingur áhuga á Elmari Kára Enessyni Cogic, kantmanni Aftureldingar, síðasta haust og spurning hvort það sé leikmaður sem Víkingar reyni við. Víkingar hafa einnig verið orðaðir við Birni Snæ Ingason (Halmstad) og Óskar Borgþórsson (Sogndal).