Magni og KA 2 mættust í eina leik dagsins hér á landi. Magni féll úr Lengjudeildinni í fyrra á meðan KA 2 er einfaldlega unglingalið Akureyringa, skipað leikmönnum fæddum frá 2002 til 2004.

Þau áttust við í Kjarnafæðismótinu og skoraði Rúnar Þór Brynjarsson fyrsta mark leiksins á 29. mínútu. Kári Gautason jafnaði fyrir KA og var staðan 1-1 í leikhlé.

Staðan hélst jöfn þar til á 74. míútu þegar Tómas Þórðarson kom táningunum yfir. Tveimur mínútum síðar jafnaði Angantýr Máni Gautason metin og staðan því 2-2 á lokakaflanum.

Rúnar Þór lét þá til sín taka eftir að hafa gert fyrsta mark leiksins. Hann bætti tvennu við á lokakaflanum og skoraði því þrennu í sigrinum.

Þetta var annar leikur Magna eftir 4-0 tap gegn Þór í fyrstu umferð. KA 2 lagði Völsung að velli og lýkur riðlakeppninni með þrjú stig.