,,Þetta var gaman, það var hasar í þessu og gaman, svona á þetta að vera," sagði Gunnar Már Guðmundsson framherji ÍBV eftir tap gegn FH í Lengjubikarnum í dag en sjö mörk voru skoruð í leiknum og tveir fengu rautt, Davíð Þorleifsson leikmaður og Hermann Hreiðarsson þjálfari ÍBV.
,,Eftir að við missum manninn útaf eigum við engin svör. Þeir eiga leikinn algjörlega eftir það og setja tvö mörk. Það er leiðinlegt að missa leikinn niður í lokin, við erum búnir að gera það í tveimur af þremur leikjum í þessari keppni."
Mikill hiti var í leiknum og tvisvar þurfti að stöðva ryksingar milli manna. Hvað olli þessum hita í leiknum?
,,Ég veit það ekki, það koma eitt tvö atriði sem menn vilja eiga. Ég veit það ekki, einhver hiti, eða þreyta eða eitthvað. En svona á þetta að vera, það er gaman að þessu svona. Það á að mæta liðunum af einhverjum krafti og setja líkamann í þá. Þá er ekkert auðvelt að eiga við okkur."
Gunnar Már var sjálfur að stríða Guðmanni Þórissyni miðverði FH í byrjun leiksins.
,,Já, ef menn eru skapheitir er um að gera að æsa þá upp í upphafi," sagði Gunnar Már sem var sjálfur framherji í leiknum og skoraði tvö mörk.
,,Þetta er svosem frekar nýtt fyrir mér en ef þetta verður í sumar þá verður bara gaman," sagði Gunnar Már en síðara mark hans skoraði hann er hann pressaði Róbert Örn markvörð sem sparkaði boltanum í hann, og eftir það þurfti Gunnar bara að setja boltann yfir marklínuna.
,,Maður reynir að pressa og þetta kemur fyrir einu sinni af hverjum 100 skiptum og þá er um að gera að nýta það. Ef maður er duglegur getur maður skorað svona ljót mörk. Bæði mörkin voru ljót í dag en þau telja jafnmikið og hin.
Nánar er rætt við Gunnar Már í sjónvarpinu að ofan.
Athugasemdir
