Eden Hazard, leikmaður Real Madrid, átti góða innkomu í leik liðsins gegn Celtic í Meistaradeild Evrópu í miðri viku.
Hann kom þá inn eftir um hálftíma leik en Karim Benzema, sóknarmaður Real, hafði þá meiðst og verður Frakkinn frá í um þrjár vikur.
Hazard stóð sig vel og sýndi gamla takta en hann skoraði eitt mark og lagði upp annað í 3-0 sigri Real í Skotlandi.
Hazard hefur átt erfitt uppdráttar síðan hann gekk í raðir Real Madrid en leikmaðurinn hefur átt við mikil meiðsli að stríða og hefur hann aldrei náð almennilegum takti í sinn leik.
Það gæti verið að breytast en Carlo Ancelotti, þjálfari liðsins, staðfesti það að Hazard muni vera í byrjunarliðinu gegn Mallorca á morgun en liðin mætast í spænsku úrvalsdeildinni.
Þetta er þá í fyrsta skiptið sem Hazard er í byrjunarliði Real Madrid síðan í janúar á þessu ári.
Gott tækifæri fyrir Hazard til að stimpla sig vel inn í liðið hjá Real á næstunni en Evrópumeistararnir hafa farið frábærlega af stað á tímabilinu og hefur liðið unnið alla sína leiki til þessa.
