Tvö af Íslendingaliðum gríska boltans mættu til leiks í dag og átti Guðmundur Þórarinsson stoðsendingu í flottum sigri OFI Crete á útivelli.
Gummi var ekki í byrjunarliði Krítar en kom inn í stöðu vinstri vængbakvarðar eftir 60 mínútna leik, í stöðunni 0-2. Undir lok leiksins átti Gummi stoðsendingu fyrir fjórða markið sem gulltryggði sigur gestanna frá Krít.
Krít lagði botnlið Lamia að velli og er með 23 stig eftir 22 umferðir - tíu stigum fyrir ofan fallsæti.
Sverrir Ingi Ingason var þá á sínum stað í hjarta varnarinnar hjá PAOK sem tapaði tveimur stigum með grátlegum hætti í dag.
PAOK var með tveggja marka forystu á Asteras Tripolis allt þar til í uppbótartímanum, þegar heimamenn í Tripolis náðu að jafna með tveimur mörkum á þremur mínútum.
Afar svekkjandi fyrir PAOK sem er í þriðja sæti deildarinnar og getur misst það til Olympiakos síðar í kvöld.
Lamia 1 - 4 OFI Crete
Asteras Tripolis 2 - 2 PAOK