Elías Már Ómarsson var í byrjunarliði Excelsior sem tapaði fyrir Roda JC, 3-1, í hollensku B-deildinni í kvöld en á meðan gerði Kolbeinn Þórðarson og félagar hans í Lommel 1-1 jafntefli við Westerlo í belgísku B-deildinni.
Elías Már hefur verið frábær með Excelsior á þessari leiktíð en hann er með 21 mark í 27 leikjum í deild- og bikar.
Það hefur þó verið þurrkur í síðustu leikjum en hann hefur aðeins skorað tvö mörk í síðustu níu leikjum liðsins.
Þrátt fyrir það er hann annar markahæsti leikmaður deildarinnar með 18 mörk, þremur mörkum á eftir Robert Mühren hjá Cambuur.
Hann spilaði allan leikinn í 3-1 tapinu í kvöld en Excelsior er í tíunda sæti deildarinnar með 30 stig.
Kolbeinn Þórðarson kom þá inná sem varamaður er Lommel gerði 1-1 jafntefli við Westerlo í belgísku B-deildinni. Lommel var 1-0 undir þegar Kolbeinn kom inná á 71. mínútu og ellefu mínútum síðar jöfnuðu gestirnir.
Kolbeinn hefur verið mikilvægur í liði Lommel á þessari leiktíð en liðið er í fjórða sæti deildarinnar með 28 stig aðeins fjórum stigum frá umspilssæti.
Athugasemdir