Jurgen Klopp, stjóri Liverpool.
Liverpool þarf án nokkurs vafa miðjumann áður en félagaskiptaglugginn lokar.
Félagið hefur á undanförnum dögum reynt að fá Moises Caicedo og Romeo Lavia en þeir hafa báðir frekar valið að fara til Chelsea.
Liverpool seldi Fabinho til Sádi-Arabíu og vantar nauðsynlega að fá varnartengilið, jafnvel tvo, til þess að styrkja miðsvæðið fyrir komandi átök í ensku úrvalsdeildinni.
Næstu vikur verða áhugaverðar hjá Liverpool en Goal ákvað að taka saman lista yfir átta miðjumenn sem félagið gæti horft til núna.
Hér fyrir neðan má skoða hvaða átta nöfn eru á listanum.
Kalvin Phillips (Manchester City) - Öflugur djúpur miðjumaður sem hefur fengið gott hlutverk í enska landsliðinu en ekki hjá Manchester City.
Boubacar Kamara (Aston Villa) - Var fenginn á frjálsri sölu til Aston Villa síðasta sumar og átti fínt fyrsta tímabil á Englandi. Er þó samningsbundinn 2027 og það gæti reynst erfitt að fá hann þegar svona lítið er eftir af glugganum.
Florentino Luis (Benfica) - Enzo Fernandez var keyptur á risa upphæð til Chelsea síðasta sumar eftir að hafa heillað með Benfica. Ein af ástæðunum fyrir því að hann stóð sig eins vel og hann gerði hjá portúgalska félaginu var þessi maður, Florentino Luis. Mjög góður í að vinna boltann og dreifa honum svo.
Joao Palhinha (Fulham) - Portúgalskur miðjumaður sem gekk til liðs við Fulham fyrir síðustu leiktíð. Hann var frábær í liði Fulham sem kom mjög á óvart í ensku úrvalsdeildinni. Hann er maðurinn sem tengir allt liðið saman.
Sofyan Amrabat (Fiorentina) - Bolabítur á miðjunni sem sló í HM í Katar með Marokkó. Hefur verið sterklega orðaður við Manchester United en Liverpool gæti stolið honum.
Cheick Doucoure (Crystal Palace) - Var keyptur til Crystal Palace fyrir síðustu leiktíð og átti mjög flott fyrsta tímabil á Englandi. Frábær tæklari og góður sendingamaður. Palace er hins vegar búið að skella á hann 70 milljón punda verðmiða.
Kephren Thuram (Nice) - Sonur goðsagnarinnar, Lilian Thuram. Kephren er hins vegar allt öðruvísi leikmaður en faðir sinn; Kephren er kraftmikill og líkamlega sterkur miðjumaður. Nice gæti freistast til að selja hann áður en glugginn lokar.
Manu Kone (Gladbach) - Afar spennandi leikmaður sem hefur verið að spila mjög vel í Þýskalandi. Öflugur í að vinna boltann og að bera hann upp. Hefur verið líkt við Jude Bellingham.
Athugasemdir
