Kolbeinn hefur leikið fyrir öll yngri landslið Íslands.
Íslenska U21-landsliðið mætir Spáni á Floridana-vellinum í Árbæ á morgun klukkan 16:45. Þetta er lokaleikur Íslands í undankeppni EM en ljóst er að strákarnir okkar eiga ekki möguleika á að komast áfram. Spánverjar hafa unnið riðilinn.
Kolbeinn Birgir Finnsson, miðjumaður U21-landsliðsins, ræddi við Fótbolta.net á sínum gamla heimavelli. Kolbeinn kemur úr Fylki en hann er í dag hjá Brentford á Englandi og spilar fyrir varalið félagsins.
Hann fékk fyrst spurningu um hvernig honum lýst á Fylkisvöllinn eftir að það kom gervigras á hann?
„Mér finnst þetta alveg frábært. Ég var fyrst ekki alveg viss með þetta fyrst. En þegar maður sér þetta þá er þetta algjör snilld," segir Kolbeinn.
„Ég er grasmaður en þetta verður bara að gerast held ég."
Næst fór umræðan út í mótherja morgundagsins.
„Það á ekki að vera neitt mál að gíra sig upp í leik gegn Spánverjum. Það er bara gaman að mæta stórþjóðum. Það eru leikmenn þarna sem spila í La Liga en við munum pottþétt stríða þeim," segir Kolbeinn en það hefur gengið vel hjá honum með varaliði Brentford.
„Það gengur mjög vel. Ég hef spilað á hægri kantinum og ég tel að það séu bjartir tímar framundan. Ef ég held svona áfram þá vona ég að fá tækifæri með aðalliðinu. Ég er búinn að vera sáttur við mig síðan ég kom þarna."
Viðtalið má sjá í heild í sjónvarpinu hér að ofan.
Athugasemdir
