Hannes Þór Halldórsson.
„Það var skrítið, það tók á taugarnar," sagði Hannes Þór Halldórsson, markvörður landsliðsins, eftir 2-1 sigur á Moldóvu í lokaleiknum í undanriðlinum fyrir EM 2020.
Lestu um leikinn: Moldóva 1 - 2 Ísland
„Við settum mikinn metnað í að vinna þetta. Við vildum alls ekki fara héðan með vonda tilfinningu. Okkur fannst líka mikilvægt að klára riðilinn með 19 stig og fara með 'momentum' inn í umspilið. Við lögðum mikið í að vinna þetta, en þetta var fulltæpt."
Framundan eru umspilsleikir í mars um sæti í lokakeppninni næsta sumar. Hannes leikur með Val í Pepsi Max-deildinni. Hann efast um að hann muni fara á láni til að halda sér í leikformi.
„Ég hef ekki hugsað það langt, en ég efast um það. Ég held að ég sé í fínum málum við góðar æfingar hjá Val. Fyrir mig snýst þetta um að vera í topp-líkamlegu standi. Ég mun vera það."
Ísland endaði riðilinn í þriðja sæti með 19 stig.
„Mér fannst við gera vel í þessum riðli, ég er stoltur af liðinu og frammistöðunni."
Umspilið eru eins og áður segir í mars. Það verður dregið í umspilið 22. nóvember, en Ísland fær að minnsta kosti einn heimaleik - ef hægt verður að spila á Laugardalsvelli í mars.
„Það er margt spennandi að fylgjast með á næstu dögum. Það verður frábær upplifun að fá alvöru úrslitaleiki, alla vega einn og vonandi tvo, á Íslandi. Það yrði magnað að fá seinni leikinn heim og þá get ég lofað þér því að við klárum þetta," sagði Hannes.
Viðtalið er í heild sinni hér að ofan.
Athugasemdir
