Birta með verðlaunin.
„Það var ótrúlega gaman að spila þennan leik," segir Birta Georgsdóttir, besti leikmaður 8-liða úrslita Mjólkurbikars kvenna. Fyrir það fær hún verðlaun frá Fótbolta.net og Mjólkursamsölunni.
Birta var maður leiksins þegar Breiðablik vann 5-1 sigur gegn HK í nágrannaslag. Hún skilaði af sér tveimur mörkum og stoðsendingu í fyrri hálfleik.
Birta var maður leiksins þegar Breiðablik vann 5-1 sigur gegn HK í nágrannaslag. Hún skilaði af sér tveimur mörkum og stoðsendingu í fyrri hálfleik.
„Við fengum fullt af áhorfendum á leikinn og maður fann orkuna úr stúkunni. Þetta var ótrúlega skemmtilegt."
Var sérstakt að spila loksins á móti HK?
„Já, þetta er í fyrsta skiptið sem þessi lið mætast. Þó þær séu í Lengjudeildinni, þá eru þær þvílíkt góðar."
Breiðablik mun mæta ÍBV í undanúrslitunum og verður það áhugaverður leikur en ÍBV er eins og HK í Lengjudeildinni.
„Þær eru líka fáránlega góðar. Ég held að það verði hörkuleikur," sagði Birta en Breiðablik hefur núna þrjú ár í röð tapað í bikarúrslitum. Það er kominn tími á að breyta því.
„Eftir tapleikinn í fyrra, þá var þetta komið gott. Við ætlum að fara alla leið núna."
Athugasemdir
