Bolton Wanderers, sem er í toppbaráttu ensku C-deildarinnar, er búið að breyta nafninu á heimavelli sínum og hefur það vakið mikla athygli á Englandi.
Byggingarfyrirtækið Toughsheet keypti nafnaréttinn á leikvanginum og því mun Bolton spila heimaleiki sína á Toughsheet Community Stadium næstu fimm árin.
Þetta hefur vakið mikla kátínu meðal fótboltaaðdáenda á Englandi enda hljómar nafnið á leikvanginum óneitanlega mikið eins og 'tough shit', eða 'harður skítur' á íslensku. Orðatiltækið 'tough shit' er notað í ensku tungumáli á svipaðan hátt og Íslendingar nota 'erfitt líf'.
„Okkur finnst þetta bara gaman," segir Doug Mercer, stjórnandi hjá Bolton. „Ég get ekki beðið eftir að þeir lýsi heimaleik hjá okkur á Sky Sports. Það verður mjög fyndið."
Til gamans má geta að Bolton fær metfé fyrir nafnaréttinn á leikvanginum næstu fimm árin, talsvert hærri upphæð heldur en Reebok og University of Bolton voru að greiða.
Jón Daði Böðvarsson er samningsbundinn Bolton en hann er meiddur út tímabilið.