Börnin og fjölskyldan er mikilvægari en fótbolti
„Það er einu sinni þannig í lífinu að það eru nokkrir hlutir sem eru mikilvægari en fótbolti. Það eru börnin okkar og fjölskyldan og allt sem snýr að fjölskyldunni er mikilvægara en fótbolti þó við gleymum því stundum. Ég er mjög ánægður fyrir hönd Gylfa og eiginkonu hans að þau séu að fara inn í frábært tímabil að eignast barn. Við samgleðjumst honum þó að sjálfsögðu munum við sakna hans."

Leikmannahópur íslenska liðsins hóf að týnast inn á hótel í Dusseldorf í dag og restin kemur á morgun. En afhverju gerist það ekki fyrr en í dag að það skýrist að Gylfi verði ekki með?

„Eins og eðlilegt er þá vissum við að hún sé ófrísk en þetta eru hlutir sem við reynum að halda opnum eins lengi og við getum. Svona hluti er betra að leyfa leikmönnum að stjórna sjálfum. Við vissum þetta í svolítinn tíma en ákvörðunin var tekin í dag."

Endanleg ákvörðun með alla þrjá leikina
Ísland mætir Þýskalandi í Duisburg á fimmtudaginn og í kjölfarið koma leikir gegn Armeníu á mánudag og Liectenstein á miðvikudag. Er Gylfi frá í öllum þessum leikjum?

„Þetta er endanleg ákvörðun fyrir alla leikina en þetta opnar möguleika fyrir aðra leikmenn og okkur staffið að skoða aðra leikmenn og möguleika. Við lítum á þetta sem áskorun að vera án eins af okkar bestu leikmönnum og gerum það besta úr þessu.

Fjarvera Gylfa setur plön ekki í uppnám
Arnar og þjálfarateymið kom á hótelið í Dusseldorf á föstudaginn og tímann hafa þeir nýtt í að plana verkefnið framundan. Setur fjarvera Gylfa plönin í uppnám?

„Nei, það gerir það ekki," sagði Arnar. „Við vissum að þetta væri möguleiki og höfum því rætt þetta og vorum með plan A, B og C og teljum okkur klára til að tækla þetta."

Telja sig ekki þurfa að bæta við leikmönnum
Björn Bergmann Sigurðarson þurfti að draga sig úr hópnum fyrir helgi vegna andstöðu félags hans, Molde í Noregi við að hann færi í ferðina. Eftir standa 23 af 25 leikmanna hópi sem Arnar valdi upphaflega. En ætlar hann að bæta við fleirum?

„Nei, ekki enn sem komið er. Við vorum búnir að reikna með því að Björn kæmi ekki og erum með aðra fjóra framherja í hópnum. Við teljum okkur ekki þurfa að bæta við enn sem komið er. En svo getur alltaf eitthvað gerst í kvöld þegar það eru leikir."

Betra stand á hópnum en í síðustu verkefnum
Arnar sagði svo í lokin að allir leikmenn í hópnum væru í góðu standi og hann ætti ekki von á frekari forföllum.

„Þeir sem eru komnir á hótelið núna og eru á leiðinni á hótelið eru í góðu standi, hafa verið að spila og eru langflestir í góðu leikformi. Þeir eru allir búnir að vera að æfa vel og það er jákvætt. Svolítið annað en hafði verið í síðustu verkefnum þar sem menn duttu inn eftir eina, tvær eða þrjár æfingar. Það er ekki upp á teningunum núna sem er mjög jákvætt," sagði Arnar að lokum.