Lið ársins í enska valið af Garth Crooks - Leikmaður ársins frá Arsenal

Markvörður - Jordan Pickford (Everton): Stig voru dregin af Everton en liðið sýndi mikinn karakter. Enski landsliðsmarkvörðurinn stóð upp úr og bjargaði liðinu með mikilvægum vörslum á stærstu tímapunktunum.

Varnarmaður - William Saliba (Arsenal): Er í fremstu röð og með hæfileika sem eiga skilið að vera verðlaunaðir með titlum.

Varnarmaður - Virgil van Dijk (Liverpool): Pressan fór illa með Liverpool sem gaf rækilega eftir. Liðið á aðeins einn fulltrúa í liði ársins.

Varnarmaður - Manuel Akanji (Man City): Kom frá Borussia Dortmund fyrir aðeins 15 milljónir punda og hefur reynst City frábærlega. Hefur orðið enn betri hjá liðinu.

Miðjumaður - Declan Rice (Arsenal): Stóð fyllilega undir 105 milljóna punda verðmiðanum.

Miðjumaður - Bukayo Saka (Arsenal): Markahæsti leikmaður Arsenal er framúrskarandi fótboltamaður.

Miðjumaður - Martin Ödegaard (Arsenal): Venjulega vel ég besta leikmann tímabilsins úr meistaraliðinu en nú geri ég undantekningu. Ödegaard er stórkostlegur leikmaður og sannur leiðtogi. Fótboltinn þarf fleiri eins og hann. Leikmaður ársins.

Miðjumaður - Cole Palmer (Chelsea): Gríðarlegir hæfileikar. 25 mörk og 15 stoðsendingar á sínu fyrsta tímabili hjá Chelsea og hann lætur hlutina líta út fyrir að vera svo auðveldir.

Sóknarmaður - Ollie Watkins (Aston Villa): Leikið lykilhlutverk í því að tryggja Villa sæti í Meistaradeild Evrópu. 27 mörk og 13 stoðsendingar.

Sóknarmaður - Erling Haaland (Man City): Hefur slegið nánast öll met í markaskorun svo það er mér hulin ráðgáta af hverju fólk hefur svona sterkar skoðanir á því sem hann gerir fyrir utan teiginn.

Sóknarmaður - Phil Foden (Man City): Hefur þroskast og þróast á stórkostlegan hátt. Þegar Kevin De Bruyne vantaði þá vann Foden leiki upp á sitt einsdæmi.