Jón Þór Hauksson þjálfari ÍA var svekktur með úrslit kvöldsins eftir að liðið hans missti sigurleik niður í jafntefli á 94. mínútu leiksins, þegar þeir heimsóttu FH.
Lestu um leikinn: FH 1 - 1 ÍA
„Þetta var bara frábær leikur, mér fannst hann vera fram og til baka nánast allar 90 mínúturnar. Bæði lið fengu frábær færi, það var ótrúlegt að það skildi vera 0-0 í hálfleiknum. Liðin héldu áfram að skapa sér frábær færi, mér fannst við vera nær því og fá betri færi, en FH kannski með meiri stjórn á leiknum. Við vorum allan tíman að skapa okkur góð færi og það var bara margt sem ég var mjög ánægður með. Það var allt annar svipur á okkur heldur en í síðustu viku og ég er mjög ánægður með það."
ÍA er í 5. sæti deildarinnar, stigi á eftir FH sem er í 4. sæti. Það hefði því verið sterkt að vinna þennan leik fyrir Skagann og komast upp fyrir þá.
„Það er auðvitað enginn heimsendir að koma hingað og fá stig. ÍA hefur ekki unnið marga leiki á þessari öld í Kaplakrika. Við vorum grátlega nálægt því í dag en það er enginn heimsendir að koma hingað og gera jafntefli. En það er mjög nálægt því þegar svona lítið er eftir af leiknum, þá er það helvíti fúlt."
Hinrik Harðarson skoraði mark ÍA en hann hefur sterkar tengingar í FH þar sem faðir hans Hörður Magnússon spilaði lengi með þeim.
„Það er náttúrulega bara geggjað, það er svolítið síðan hann skoraði. Hann er búinn að spila frábærlega hjá okkur í sumar og gerði það virkilega vel. Það var einhver tilfinning að hann myndi gera það í dag, mér fannst hann frábær í dag og átti svo sannarlega skilið að þetta yrði sigurmarkið í leiknum. En það endaði ekki þannig því miður."
Viðtalið má sjá í heild sinni í spilaranum hér fyrir ofan.
