Jóhann Kristinn, þjálfari Þórs/KA, sagðist skammast sín fyrir fyrri hálfleik liðsins í dag, sem þær fengu 6 mörk á sig í, og vonast til að svoleiðis gerist aldrei aftur.
Hann veit að liðið hefur að engu að keppa, en vill samt að sínar konur haldi baráttunni út mótið.
Lestu um leikinn: Breiðablik 6 - 1 Þór/KA
6-0 undir í hálfleik. Hvað gerðist eiginlega í fyrri hálfleik?
„Það var ansi margt greinilega. Það var til skammar hvernig við spiluðum fyrri hálfleikinn og okkur ekki til sóma hvernig við leysum úr því sem að gerist. Við fáum besta lið landsins fljúgandi á okkur og þær með öll sín gæði léku á alls oddi á heimavelli í blíðunni. Ég og leikmenn urðum okkur pínu til skammar að ná ekki að bregðast við þessu á nokkurn einasta hátt.
Ég verð að vera ánægður með það hvernig við svöruðum í seinni og náðum aðeins að þrífa upp eftir okkur en það á ekki að þurfa að gera það, við eigum að gera betur en við gerðum í fyrri.“
Þór/KA hefur ekki að neinu að keppa, hafði það áhrif á leikmenn í fyrri hálfleik og ræddi Jóhann það við þær í hálfleik?
Þessi umræða fer alveg fram og það er engin inni í klefa hjá okkur svo vitlaus að halda að þetta sé einhvern veginn öðruvísi en það er. Í síðustu tveimur leikjum höfum við verið að keppa við lið sem eru að berjast um gull og við erum ekki að elta neitt nema bara að verða betri, æfa okkur og vinna hitt liðið. Það á að vera nóg mótivering en það er enginn heldur enginn svo vitlaus að halda að þótt það eigi að vera nóg mótivering þá er þetta ekki alveg það sama. Við höfum svolítið séð stemninguna hjá liðunum, þó við höfum reynt. Stelpurnar reyndu, en þetta var niðurstaðan í dag og hún má ekki koma fyrir aftur.
Viðtalið í heild sinni má sjá í spilaranum hér að ofan
