Marokkó 1 - 2 Suður-Afríka
0-1 Hildah Magaia ('63)
0-2 Hildah Magaia ('71)
1-2 Rosella Ayane ('81)
Marokkó og Suður-Afríka áttust við í úrslitaleik Afríkumóts kvenna og var gríðarlega mikil eftirvænting fyrir viðureignina.
Leikvangurinn var nánast fullur þremur tímum fyrir upphafsflautið þar sem áhorfendur reyndu að koma sér í bestu sætin. Allir miðar á leikinn kostuðu jafn mikið og eru sætin ekki númeruð.
Það komast 53 þúsund manns fyrir á leikvanginum og ef hann fylltist hefur aðsóknarmet verið slegið á kvennaleik í Afríkumótinu. Aðsóknarmetið var síðast slegið í undanúrslitum þegar rúmlega 45 þúsund manns horfðu á Marokkó slá Nígeríu úr leik.
Í kvöld hafði Suður-Afríka betur gegn heimakonum þökk sé Hildah Magaia sem skoraði tvennu á átta mínútna kafla. Magaia var meðal betri leikmanna sænsku B-deildarinnar á síðustu leiktíð og er núna að raða inn mörkunum með Sejong Sportstoto í Suður-Kóreu.
Rosella Ayane, leikmaður Tottenham, minnkaði muninn undir lokin en það dugði ekki til. Suður-Afríka er Afríkumeistari kvenna 2022.
Þetta er í fyrsta sinn sem Suður-Afríka vinnur keppnina þar sem aðeins tvær þjóðir höfðu unnið hana hingað til - Nígería ellefu sinnum og Miðbaugs-Gínea tvisvar.
