Það eru miklar væntingar bornar til Orra Steins sem hefur verið afar eftirsóttur í sumar. Orri er 19 ára gamall og skoraði 10 mörk í 27 deildarleikjum í fyrra. Í heildina skoraði hann 15 og gaf 8 stoðsendingar í 41 leik í öllum keppnum.

Spænska félagið Girona lagði fram tveggja milljarða króna tilboð í hann fyrr í sumar. FCK hafnaði því tilboði. Hann hefur einnig verið orðaður við Stuttgart, Atalanta og Bologna í sumar og vitað er að fleiri félög fylgjast vel með honum.

David Nielsen, sem stýrði Lyngby á síðasta tímabili, segist skilja áhugann á Orra mjög vel en hann ræddi um íslenska sóknarmanninn á TV2 á dögunum.

„Hann er frábær leikmaður sem hreyfir sig vel í teignum. Þegar þú ert með leikmann sem getur komið niður og tengt við liðsfélagana, hlaupið aftur fyrir vörnina og ógnað eins og hann, og klárað eins og hann, þá skilurðu af hverju FCK hefur lagt mikið á sig til að halda honum," segir Nielsen.

Orri framlengdi nýverið samning sinn við FCK en hann stefnir á að vera markahæsti leikmaður dönsku deildarinnar á tímabilinu sem var að hefjast.