„Blendar tilfinningar, við erum mjög stolt af stelpunum, við komum til baka eftir að lenda 2-0 undir á móti mjög góðu liði Fylkis, jöfnum leikinn í 2-2 og finnst við einhvern veginn hafa völdin. Þetta var bara ógeðslega skemmtilegur fótboltaleikur sem gat farið bara báðu megin og í kvöld fór það Fylkis megin því miður.” Þetta sagði Óskar Smári, þjálfari Fram, aðspurður um fyrstu viðbrögð eftir 3-2 tap á móti Fylki í kvöld
„Við erum ótrúlega súr, en við erum ekki fúl eða pirruð út í stelpurnar, þær lögðu allt í þetta, og það svona svíður ennþá meira þegar leikmenn leggja svona mikið á sig og fá ekki það sem okkur finnst þær eiga skilið.”
„Við lögðum mikla vinnu í þennan leik að því að okkur langar að ná markmiðunum okkar sem eru ennþá til staðar í sumar.”
Fylkir skoraði sigurmark á 87. mínútu leiksins: „Við vissum alveg að það kæmi mark, það var bara spurning hvoru megin og okkur fannst við svona vera þrýsta meira til þess að ná þriðja markinu.”
Fram á núna tvo leiki eftir af tímabilinu, en hvernig finnst Óskari tímabilið búið að ganga?: „Við erum bara nokkuð sátt, við hefðum auðvitað klárlega viljað vera með fleiri stig. Við erum nokkuð sátt með sumarið, við erum að sjá leikmenn stækka og verða betri og fara upp á levelið sem ekkert margir áttu von á og við erum að sjá liðið verða betra bara þegar líður á sumarið.”
Viðtalið má sjá í heild sinni í spilaranum hér fyrir ofan. Þar fer Óskar einnig yfir markmannsmál, gengi liðsins og hvernig Fram lagði upp leikinn í kvöld.
