Það hefur farið í taugarnar á Zlatan að LeBron nýti sér samfélagsmiðla til þess að breyta samfélaginu og viðra þar pólitískar skoðanir.

Zlatan sagði honum að halda sig við körfuboltann og einbeita sér að því sem hann hefur atvinnu af en LeBron svaraði fyrir sig og vill hann halda áfram að reyna berjast fyrir jafnrétti.

Raiola er hins vegar sammála Zlatan og finnst það ekki eiga við að blanda íþróttamönnum eða pressa á atvinnumenn að berjast fyrir mannréttindum.

Það hefur þegar komið í fréttum að norska landsliðið íhugar að sniðganga heimsmeistaramótið í Katar. Hátt í 6500 verkamenn hafa dáið við að byggja leikvanga fyrir mótið og hafa leikmenn og þjálfarar lýst yfir miklum áhyggjum yfir þessum mannréttindabrotum.

„Zlatan er sannfærður um að íþróttir og pólitík eigi ekki saman og hann vill ekki vera partur af því. Það er rétt hjá honum. Ég er ekki sammála því að það eigi að pressa á leikmenn að fordæma HM í Katar eða koma með yfirlýsingu varðandi stöðuna þar," sagði Raiola.

„Það voru ekki leikmennirnir sem kusu að mótið yrði haldið í Katar. Þeir eru ekki hluti af FIFA, þannig af hverju eiga þeir að koma með yfirlýsingu þegar leikmenn eiga bara að reyna að gera sitt besta til að spila á hæsta stigi sem er heimsmeistaramótið," sagði hann ennfremur.